आज बिहानै उनन्तीस यात्रु सवार गाडी दुर्घटना, शाहीको मृत्यु

सुर्खेत , हेरालाे खबर

सुर्खेतमा आज बिहान २९ जना यात्रु सवार गाडी दुर्घटना हुँदा एक जनाको ज्यान गएको छ ।

दुर्घटनामा अन्य ६ जना घाइते भएका छन् । मृत्यु हुनेमा दैलेखको ठाटीकाँध गाउँपालिका वडा नं ४ का ३५ वर्षीय दीपक शाही छन् ।

जिल्ला प्रहरी कार्यालय सुर्खेतका अनुसार दुर्घटनामा गम्भीर घाइते भएका उनलाई कर्णाली अस्पताल सुर्खेतमा पुर्याइएकामा चिकित्सकले मृत घोषणा गरेको हो । सबै घाइतेको कर्णाली केयर अस्पतालमा उपचार भइरहेको छ ।

जुम्लाबाट वीरेन्द्रनगरतर्फ आउँदै गरेको कर्णाली प्रदेश ०२२१ ख १०१४ नम्बरको गाडी बराहताल गाउँपालिका वडा नं ८ को हुड्केमा दुर्घटना भएको हो । गाडी अनियन्त्रित भएर दुर्घटना भएको प्रहरीले जनाएको छ ।