सङ्घर्ष र समर्पणको प्रतिफल: मरिना धिमाल हवल्दारमा पदोन्नति 

हेरालाे खबर

सङ्घर्ष र समर्पणको प्रतिफल: मरिना धिमाल  हवल्दारमा पदोन्नति
मैदानमा हातमा झण्डा लिएर अफसाइड र फलको निर्णय लिने फिफा सहायक रेफ्री मरिना धिमालको कार्यकुशलता अब प्रहरी पोसाकमा पनि नयाँ दर्ज्यानी चिन्नसहित देखिने भएको छ। सशस्त्र प्रहरी बलकी सहायक हवल्दारको रूपमा कार्यरत मरिना आफ्नो अथक मेहेनत र व्यावसायिक सफलताका कारण प्रहरी  हवल्दार (Head Constable) पदमा पदोन्नति भएकी छिन्।

​आफ्नो पदोन्नति पछि खुसी व्यक्त गर्दै मरिनाले यो सफलता कुनै संयोग वा छोटो बाटोबाट नआएको स्पष्ट पारेकी छिन्। “धेरैलाई यो अचानक लागेको हुन सक्छ, तर यो मेरो वर्षौँको त्याग, अनुशासन र कडा परिश्रमको परिणाम हो,” उनले भनिन्। सन् २०२४ देखि २०२६ सम्मको अवधि उनको खेल जीवन र व्यावसायिक करियरका लागि ‘स्वर्ण युग’ सावित भएको छ।
मरिनाको सङ्घर्षको कथा फुटबल मैदानको रेखाभित्र मात्र सीमित छैन। उनले सन् २०२४ मा फिफा सहायक रेफ्री (FIFA Assistant Referee) को मान्यता पाएपछि आफ्नो स्तरलाई थप उचाइमा पुर्‍याइन्। उनको निरन्तरको लगावले गर्दा उनले एएफसी एलाइट रेफ्री (AFC Elite Referee) को प्रतिष्ठित सूचीमा समेत स्थान बनाउन सफल भइन्।

उनको पछिल्लो दुई वर्षको उपलब्धिहरू यस प्रकार छन्:
फिफा मान्यता: सन् २०२४ देखि २०२६ सम्म निरन्तर फिफा सहायक रेफ्रीको रूपमा सक्रिय।
एएफसी एलाइट: एसियाली फुटबलकै उच्च तहको ‘एलाइट’ रेफ्रीको सूचीमा समावेश।
अन्तर्राष्ट्रिय अनुभव: छोटो समयमै ४ वटा ठुला एएफसी (AFC) प्रतियोगिताहरूमा निर्णायकको भूमिका निर्वाह गरी नेपालको नाम उच्च राखेको।
प्रहरीको कठिन ड्युटी र रेफ्रीको कडा शारीरिक प्रशिक्षणलाई सँगसँगै लैजानु मरिनाका लागि सहज थिएन। झिसमिसेमै मैदानमा पसिना बगाउनु, व्यक्तिगत सुख-सुविधा त्याग्नु र निरन्तर वैदेशिक भ्रमणका बाबजुद आफ्नो पेशागत मर्यादा कायम राख्नु नै उनको सफलताको रहस्य हो।
नेपाली फुटबल र सशस्त्र प्रहरी बल दुवैका लागि मरिना धिमाल यतिबेला एउटा उदाहरणीय नाम बनेकी छिन्। उनको यो पदोन्नतिले खेल क्षेत्रमा लाग्ने अन्य महिला सुरक्षाकर्मीहरूका लागि ठुलो ऊर्जा प्रदान गरेको छ।