एनएमबी लघुवित्तद्वारा मृतक सदस्यका परिवारलाई बीमा रकम हस्तान्तरण

हेरालो खबर, असार ७ , नेपालगञ्ज, बाँके । एनएमबी लघुवित्त वित्तीय संस्था लिमिटेड अन्तर्गत लुम्बिनी प्रदेशको शाखा कार्यालय नेपालगञ्जको केन्द्र नं. ०३५ की सदस्य श्रीमती रिना गुरुङका श्रीमान् श्री प्रकाश आलेको असामयिक निधन भएको घटनाप्रति संस्थाले गहिरो दुःख व्यक्त गरेको छ। यस दुःखद घटनाले परिवार, आफन्तजन तथा समुदायलाई अपूरणीय क्षति पुगेको भन्दै संस्थाले दिवङ्गत आत्माको चिरशान्तिको कामना तथा शोकसन्तप्त परिवारप्रति हार्दिक समवेदना व्यक्त गरेको छ।

सदस्यहरूको सामाजिक तथा आर्थिक सुरक्षालाई प्राथमिकतामा राख्दै आएको एनएमबी लघुवित्त वित्तीय संस्था लिमिटेडले विपद् तथा दुःखद परिस्थितिमा सदस्यहरूको साथमा रहने आफ्नो प्रतिबद्धता अनुरूप मृतकका परिवारलाई काजकिरिया खर्च तथा कर्जा बीमा बापत एकमुष्ट रु. १,३०,०००/- (अक्षरेपी एक लाख तीस हजार रुपैयाँ मात्र) आर्थिक सहयोग उपलब्ध गराएको जनाएको छ।

उक्त सहयोग रकम हस्तान्तरण कार्यक्रममा सम्बन्धित वडाका वडा सदस्य श्री रमकुमार सुनार, संस्थाका क्षेत्रीय प्रबन्धक श्री राजेन्द्र बहादुर खड्का, शाखा प्रबन्धक श्री इन्द्र बहादुर चलाउनेलगायत स्थानीय सरोकारवालाहरूको उपस्थिति रहेको थियो। कार्यक्रममा उपस्थित प्रतिनिधिहरूले स्वर्गीय प्रकाश आलेप्रति श्रद्धाञ्जली अर्पण गर्दै शोकाकुल परिवारप्रति समवेदना व्यक्त गरेका थिए।

कार्यक्रममा बोल्दै संस्थाका प्रतिनिधिहरूले सदस्यहरूको जीवनमा आइपर्ने विभिन्न जोखिम तथा कठिन परिस्थितिमा बीमा सुविधाले महत्वपूर्ण राहत प्रदान गर्ने बताए। लघुवित्त सेवासँगै सदस्यहरूको सामाजिक सुरक्षा र आर्थिक सशक्तीकरणका लागि संस्थाले विभिन्न बीमा तथा संरक्षणमुखी कार्यक्रम सञ्चालन गर्दै आएको समेत जानकारी दिइएको छ।

बीमा तथा राहत रकम हस्तान्तरण गर्दै संस्थाका प्रतिनिधिहरूले यस्तो सहयोगले परिवारलाई दुःखको क्षणमा केही राहत पुग्ने विश्वास व्यक्त गरेका छन्। साथै, सदस्य तथा उनका परिवारलाई आकस्मिक घटनाबाट उत्पन्न आर्थिक भार कम गर्न बीमा योजनाहरू प्रभावकारी माध्यम बन्ने उल्लेख गरिएको थियो।

सहयोग रकम प्राप्त गरेपछि सदस्य श्रीमती रिना गुरुङले आफ्नो परिवारलाई परेको दुःखद परिस्थितिमा एनएमबी लघुवित्त वित्तीय संस्था लिमिटेडले देखाएको साथ, सहयोग र संवेदनशीलताप्रति आभार व्यक्त गरिन्। उनले संस्थाबाट प्राप्त आर्थिक सहयोगले परिवारलाई केही राहत मिलेको बताउँदै संस्थाप्रति धन्यवाद व्यक्त गरिन्।

एनएमबी लघुवित्त वित्तीय संस्था लिमिटेडले सदस्यहरूको आर्थिक उन्नयनसँगै सामाजिक सुरक्षालाई समेत प्राथमिकतामा राख्दै विभिन्न कल्याणकारी कार्यक्रम सञ्चालन गर्दै आएको छ। संस्थाले आगामी दिनहरूमा पनि सदस्यहरूको हित, सुरक्षा तथा समृद्धिका लागि यस्ता कार्यक्रमहरूलाई निरन्तरता दिने प्रतिबद्धता व्यक्त गरेको छ।