विवाहित महिलाबीचको सौन्दर्य प्रतियोगिता मिसेस २०२६ को स्यासिङ समारोहकाे फाइनल

हेरालाे खबर

विवाहित महिलाबीचको सौन्दर्य प्रतियोगिता मिसेस नेपाल वल्र्ड २०२६ को स्यासिङ समारोहले नै फाइनल स्पर्धाको झल्को दिएको छ। स्यासिङ समारेह फाइनल शोकै झल्को दिने गरी बिहीबार साँझ राजधानीमा भव्यताका साथ सम्पन्न भएको छ।

विवाहित महिलाबीचको सबैभन्दा प्रभावशाली सौन्दर्य प्रतियोगिता मिसेस नेपाल वल्र्ड २०२६ को यो कार्यक्रम स्यासिङ समारोह नै यस्तो छ, फाइनल कार्यक्रम कस्तो होला भन्ने कौतुहलता जगाउँदै सम्पन्न भएको हो। समारोहमा अन्तिम स्पर्धाका लागि २२ जना महिला छनोट भएका छन्। देशका विभिन्न भागमा गरिएको अडिसनबाट अन्तिम प्रतिस्पर्धाका लागि छनोट भएका उनीहरूलाई सो समारोहमा विभिन्न क्षेत्रका ख्यातिप्राप्त र सफल व्यक्तित्वहरुबाट ट्याग नम्बर र स्यास प्रदान गरिएको छ।

राजधानीको थापागाउँस्थित बानेश्वर हिल्समा आयोजित समारोहमा अन्तिम स्पर्धाका लागि छनोट भएका महिलाहरूले आफ्नो परिचय दिएका थिए। समारोहसँगै उनीहरूलाई प्रतियोगिताको औपचारिक प्रतिस्पर्धीका रूपमा प्रस्तुत गरिएको आयोजकले जनाएको छ।
यस वर्षको प्रतियोगिताको अन्तिम स्पर्धामा प्रियशिखा खड्का, सगुन खनाल, सोफिया ढकाल, ऋचा शर्मा, स्वेक्षा पौड्याल, रस्ना श्रेष्ठ, यस्मिन बेगम सइद, नेहा गुप्ता, दिप्ती ढुंगेल, बिन्दु थापा राना, शिल्पा न्यौपाने, शान्ता राना, सुनिता श्रेष्ठ कर्माचार्य, सन्ध्या लामा, बिनिता गुरुङ, ज्योति लामिछाने, समीक्षा रानाभाट, सुष्मा थापा, क्रिस्टिना ज्ञवाली, अञ्जु परियार, मोनिका तामाङ र कञ्चन महर्जनले प्रतिस्पर्धा गर्दैछन्।

आयोजक संस्था रिवन इन्टरटेनमेन्टका अध्यक्ष निशुकान्त झाका अनुसार यसपटकको प्रतियोगितामा विभिन्न पेसा र क्षेत्रका महिलाको सहभागिता छ। झाका अनुसार गृहिणीदेखि डाक्टर, इन्जिनियर, बैंकर, व्यवसायी, स्वास्थ्यसेवी, फेसन डिजाइनर, नर्स तथा व्यवस्थापकसम्मका महिला अन्तिम स्पर्धाका लागि छनोट भएका छन्। प्रतियोगिताले विभिन्न पेसामा सक्रिय तथा पारिवारिक जिम्मेवारी सम्हालिरहेका महिलालाई आफ्नो प्रतिभा र व्यक्तित्व प्रस्तुत गर्ने अवसर दिने आयोजक शिला बास्तोलाको भनाइ छ ।

मिसेस नेपाल वल्र्ड २०२६ को ग्रान्ड फिनाले आगामी कात्तिक १४ गते नेपाल पुलिस क्लबमा आयोजना हुने भएको छ। प्रतियोगिताबाट छानिने मिसेस नेपाल वल्र्ड विजेताले अमेरिकामा आयोजना हुने अन्तर्राष्ट्रिय प्रतियोगिता मिसेस वल्र्डमा नेपालको प्रतिनिधित्व गर्ने अवसर पाउनेछिन्।

अश्विनी झाको कोरियोग्राफीमा आयोजना हुने मिसेस नेपाल वल्र्ड २०२६ को सोही मञ्चबाट मिसेस नेपाल इन्टरनेसनल, एमएस इन्टरनेसनल र मिसेस कोस्मोको विजेतासमेत चयन गरिने आयोजकले जनाएका छन्। यी उपाधिका विजेताले सिंगापुरमा आयोजना हुने अन्तर्राष्ट्रिय प्रतियोगितामा सहभागी हुने अवसर पाउनेछन्। सहभागीहरुलाई नृत्य प्रशिक्षण सन्दीप भुजेलले दिने छन्।

विभिन्न प्रशिक्षकहरुद्वारा करिब ४५ दिनको प्रशिक्षण पश्चात संचालन हुने कार्यक्रमको सह–कोरियोग्राफी निशा बराइलीले गर्नेछिन् भने गंगा महर्जन र विन्दिया श्रेष्ठको संयोजनमा कार्यक्रम सञ्चालन हुनेछ। रिवन इन्टरटेनमेन्टले आयोजना गर्दै आएको प्रतियोगिताको नयाँ संस्करणमा छनोट भएका २२ प्रतिस्पर्धीले अब ग्रान्ड फिनालेका लागि विभिन्न प्रशिक्षण तथा प्रतिस्पर्धात्मक गतिविधिमा सहभागी हुनेछन्।