छैटौं राष्ट्रिय एमेच्योर बुद्धिचाल सुरु

हेरालाे खबर

 नेपाल बुद्धिचाल महासंघ र नाइट चेस क्लब, झापाको संयुक्त आयोजनामा छैटौं राष्ट्रिय एमेच्योर बुद्धिचाल प्रतियोगिता शुक्रवार सुरु भएको छ।

काँकडभिट्टा स्थित होटल व्यवसायी संघ मेचिनगरको सभाहलमा चार दिन सम्म चल्ने चेस खेलमा समूह ‘क’मा २ हजार रेटिङ मुनिका २६ जना राष्ट्रिय एमेच्योर खेलाडी रहेको आयोजकले जनाएको छ। समूह ‘ख’ मा १७ सय रेटिङ मुनिका ६४ खेलाडीहरुले प्रतिस्पर्धा गरिरहेका छन्।

प्रतियोगिताका निर्देशक भरत गुरुङको रेखदेखमा सम्पन्न समूह ‘क’ पहिलो चरणको खेलमा १२ जना खेलाडीले जित निकालेका छन्। पहिलो वोर्डमा कालोगोटीले खेलेका पूर्व नेपाल च्याम्पियन सिएम पुरुषोत्तम चौलागाईंले आयोजक क्लबका अध्यक्ष विश्वविजय घिमिरेलाई माथि दिए।

मेची नगरपालिका र पशुपति बोर्डिङ स्कुलको मुख्य प्रायोजनमा सञ्चालन भएको दोश्रो वोर्डमा पूर्व एमेच्योर च्याम्पियन सिएम कृष्ण थापाले उमेश राईलाई पराजित गरेका छन्।

अर्को खेलमा निलम बस्नेतले अप्रत्याशित नतिजा निकाल्दै आफू भन्दा उच्च रेटेड सुरज महर्जन माथि कठिन जित हासिल गरेका छन्।

त्यस्तै आशिष् फुयालले ललित बहादुर राईलाई, प्रेम लिम्बुले राजेन्द्र राईलाई, वसन्त लामाले सुमन श्रेष्ठलाई र पूर्व नेपाल च्याम्पियन सिएम नवीन तण्डुकारले बल बहादुर तामाङलाई हराएर समान १ अंक जोडेका छन्।

समूह ‘ख’ को प्रतिस्पर्धामा २७ जना खेलाडीहरुले पहिलो चरण पार गर्न सफल भएका छन्। कृष सबेङहाङ्गले पहिलो चरणको पहिलो वोर्डमा शीर्ष खेलाडी राजन पहाडी माथि जित निकाले ।

कृष सँगै रञ्जित राई, एसिएम कृजन महर्जन, पवन पौड्वाल, गोविन्दमान श्रेष्ठ, अविरल राई, राजकुमार वान्तवा, क्षितिज लिम्बु, रोशन खड्गी लगायत खेलाडीले समान १ अंक जोडेका छन्।

प्रतियोगिताको विजेताले उपाधिसहित ५० हजार रुपैयाँ प्राप्त गर्नेछन्। दोस्रोले २५, तेस्रोले १५ , चौथोले १२, पाँचौंले १० , छैटौंले ८ , सातौंले ६ र आठौं देखि दशौं हुने समान ५ हजार रुपैयाँ पाउनेछन् ।

छैटौं राष्ट्रिय एमेच्योर चेस खेल एफए कोर्स पूरा गरेका निर्णायक सोराज ताम्राकारले सञ्चालन गरको‌ प्रतियोगितामा विभिन्न जिल्लाका ९० राष्ट्रिय खेलाडी सहभागी भएका छन्।