आहा रारा पोखरा गोल्डकपमा दुई विदेशी टोली भिड्दै

पाेखरा  , हेरालाे खबर

२४ औं आहा!रारा गोल्डकप फुटबल प्रतियोगिताको अन्तिम क्वाटरफाइनलमा आज दुई विदेशी टोली भिड्दैछन्‌।

पोखरा रंगशालामा दिउँसो २:३० बजे सुरु हुने खेलमा भारत सिक्किमको थन्डरबोल्ट नर्थ युनाइटेड र उज्वेकिस्तानको ब्ल्याक बुल्स एफसीबिच प्रतिस्पर्धा हुनेछ।

दुवै टोली पहिलो पटक आहा गोल्डकपमा सहभागी भएका हुन्। ब्ल्याक बुल्सले सिधै क्वाटरफाइनलमा प्रवेश पाएको थियो। थन्डरबोल्टले भने दुई पटकको च्याम्पियन संकटा क्लबलाई ३-१ ले हराउँदै अन्तिम आठको यात्रा गरेको थियो।

थन्डरबोल्टले १-० ले पछि परेको खेल उल्टाइएको थियो। यो खरलको विजेताले ५ पटकको विजेता थ्री स्टार क्लबको सामना गर्नेछ। मच्छिन्द्र फुटबल क्लबलाई टाइब्रेकर ४-२ ले हराउँदै थ्री स्टार एक कदम अघि बढेको थियो।

पूर्व विजेता मध्ये थ्री स्टार र नेपाल पुलिस क्लब मात्रै यसपटक सेमिफाइनल पुग्न सफल भएका छन् । पुलिस र मनाङ मस्र्याङ्दी क्लबले आहा राराका दुई‌ सर्वाधिक सफल टोली हुन् ।

समान ६ पटक जितेका यि दुइ टोली मध्ये यसपटक मनाङले भाग लिएन । २३ औं संस्करणसम्म ८ टोलीले मात्र आहा गोल्डकप जितेका छन् । मनाङसँगै एक पटकको विजेता अफ्रिकन युनाइटेडबाहेक ६ विजेता टोलीले यस पटक भाग लिएका थिए।

त्यसमध्ये दुई पटकको विजेता संकटासहित समान एक‌ पटकका विजेता आयोजक सहारा क्लब पोखरा, एपिएफ र त्रिभुवन आर्मी फुटबल क्लब बाहारिसकेका छन् ।

आर्मी सोमवार चर्च ब्वाइज युनाइटेड सँग १-० ले पराजित भएको थियो। एपिएफलाई मच्छिन्द्रले २-० र आयोजकलाई‌ पुलिसले १-० ले हराएको थियो।
यसपटकको विजेताले १२ लाख १ हजार र दोस्रो हुने टोलीले ६ लाख १ हजार रुपैयाँ प्राप्त गर्नेछ।